एक्शन संचार

रासोपा सभापति रवि लामिछानेको पक्राउको विषयलाई लिएर विपक्षी दलका नेता र प्रधानमन्त्री ओलीबीच बालुवाटारमा ठूलो भनाभन भएको खुलासा भएको छ। हिजो सोमबार साँझ रवि लामिछाने पक्राउको विरोधमा ज्ञापनपत्र बुझाउन गएका विपक्षी दलका नेताहरू—माओवादी केन्द्रका अध्यक्ष प्रचण्ड, एकीकृत समाजवादी पार्टीका अध्यक्ष माधवकुमार नेपाल, राष्ट्रिय स्वतन्त्र पार्टीका उपसभापति डोलप्रसाद अर्याल लगायतका नेताहरू—प्रधानमन्त्री ओलीलाई ज्ञापनपत्र बुझाउन प्रधानमन्त्री निवास बालुवाटार पुगेका थिए।

माओवादी अध्यक्ष प्रचण्डले “लामिछानेलाई पक्रनु गलत भयो” भन्ने प्रसङ्ग उठाउनासाथ प्रधानमन्त्री ओली एक्कासी कड्किँदै दाहाललाई जवाफ दिँदै भने, “लामिछानेले ‘सरकार मर्यो, जुठो पर्यो’ भनेर पक्रिनु अघि दिएको अभिव्यक्तिले राजनीतिमा कस्तो संस्कार बसाल्दैछ? के यो सही हो? मैले कसैलाई पनि व्यक्तिगत भावनाले हेर्ने गरेको छैन। सबैप्रति मेरो समभाव छ, राजनीतिक व्यवहार छ, चाहे सत्तापक्ष होस् कि प्रतिपक्ष।” ओली थप आक्रोशित हुँदै भने, “अमेरिकाको भ्रमणमा नेपाली समुदायलाई भेट्ने मेरो कार्यक्रमलाई समेत रासोपाले बिथोलेको तपाईँहरुलाई थाहा नै छ। उनीहरूको यो व्यवहारले अन्तर्राष्ट्रिय समुदायमा कस्तो सन्देश गएको छ? केपी ओलीको बेइज्जत भयो कि देशको बेइज्जत भयो?” ओलीले प्रचण्डलाई प्रश्न गरे।

प्रचण्डले भने, “मैले आफ्नो र अर्काको केही पनि नछुटाई सबैलाई कारबाहीको दायरामा ल्याएको थिएँ। तर, तपाईंले आफ्नालाई च्यापेर विपक्षी दललाई मात्र निशाना बनाउनु भएको छ, किन?” जवाफ दिँदै ओलीले भने, “सायद साथीहरूलाई प्रधानमन्त्री हुँदा त्यस्तो कुराको बानी परेको होला। मैले त्यस्तो गर्नु त के, सोचेको पनि छैन। लामिछाने पक्राउ पर्नु सरकारको नभई संसदीय समितिले बनाएको सूर्य थापा नेतृत्वको सहकारी छानबिन समितिको प्रतिवेदन कार्यान्वयन गर्ने एउटा प्रक्रिया मात्र हो। सूर्य थापा नेतृत्वको सहकारी छानबिन समितिको प्रतिवेदनमा रवि लामिछानेको पनि नाम छ भन्छन् नि त।” ओलीले प्रतिप्रश्न गरेपछि राष्ट्रिय स्वतन्त्र पार्टीका माननीय सांसद शिशिर खनालले भने, “तपाईंले प्रतिवेदन पढ्नुभएको रहेनछ। के म प्रतिवेदनबारे अहिले यहाँ ब्रिफिङ गरौं? म पनि प्रतिवेदन समितिको एक सदस्य हुँ। कतै पनि रवि लामिछानेको नाम सहकारीमा मुछिएको प्रतिवेदनमा देखिँदैन।” ज्ञापनपत्र बुझाउन गएको कारण राष्ट्रिय स्वतन्त्र पार्टीका माननीय खनाललाई भने ब्रिफिङ गर्ने समय प्राप्त भएन।

यता, एकीकृत समाजवादीका अध्यक्ष माधवकुमार नेपालले ओलीलाई “बाढी, पहिरो देशमा आएर विषम परिस्थिति हुँदा पनि विपक्षी दलको सर्वदलीय बैठक बोलाउनु पर्दैन?” भनेर प्रश्न गरे। ओलीले यस्तो कुरामा राजनीति नगर्न आग्रह गर्दै माधव नेपाललाई भने, “सरकारले घाइतेहरूको निःशुल्क उपचार गरिरहेको छ। हराएकाहरूको खोजी कार्य जारी छ। सबै संयन्त्र प्रयोग गरिएको छ। विपदको घडीमा सबैलाई मिलेर साथ दिन आग्रह गर्दै” ओलीले भने, “यस्तो समयमा पनि तपाईंहरू राजनीतिक रोटी सेक्न खोज्नुहुन्छ। सरकारले तीव्रतापूर्वक काम गरिरहेको छ। भ्रष्टाचारको सन्दर्भमा शून्य सहनशीलता अपनाएर हामी काम गर्छौं। भ्रष्टाचारमा कोही पनि आफन्त बन्ने हुँदैन। केही दिनमा रिजल्ट थप सशक्त रूपमा देख्नुहुनेछ।” ओलीले भने।

ज्ञापनपत्र बुझाउन गएका अर्का आम जनता पार्टीका अध्यक्ष प्रभु शाहले गौर हत्याकाण्डको छानबिन नहुने, सरकारलाई समर्थन गरेकै कारण उपेन्द्र यादवलाई काखी च्याप्ने अनि लामिछानेलाई पक्रने भन्ने प्रश्नमा प्रधानमन्त्री ओलीले भने, “विधि, पद्धति, र संस्कारको राजनीतिमा जोड दिनुहोस्। आज सत्तामा भएका भोलि प्रतिपक्षमा रहनुपर्छ, प्रतिपक्षमा भएका सत्तामा जाने दिन आउँछ। व्यक्तिगत भावनाले कसैलाई पनि हेरिएको छैन। तर, राजनीतिक संस्कारमा सबैले जोड दिनुपर्छ।” उनले भने, “राष्ट्रिय स्वतन्त्र पार्टीका कार्यकर्ताहरूमा राजनीतिक संस्कार देखिएन।”

यसरी भनाभनकै क्रममै ज्ञापनपत्र बुझाएर सबैजना बालुवाटारबाट निस्किएका थिए।

यतिबेला राष्ट्रिय स्वतन्त्र पार्टीका सभापति रवि लामिछानेलाई कास्की जिल्लाको पोखरामा हिरासतमा राखेर अनुसन्धान भइरहेको छ भने रासोपाले पोखरा केन्द्रित आन्दोलन जारी राखेको छ। प्रत्येक जिल्लाबाट कम्तिमा १०० जना उपस्थित हुनका लागि उर्दी समेत जारी गरेका कारण आन्दोलन सशक्त बनाउँदै लागेको छ।