एक्शन संचार

कुनै समय फेसन सहरको रूपमा चर्चित धरान लाहुरेहरू विदेशीए पछि विस्तारै सामाजिक, सांस्कृतिक र विकासका दृष्टिकोणले समेत पछि परेको महसुस भैरहेको छ। धरानमा पछिल्लो वर्षहरूको चाडबाडले यो कुरा लाई पुष्टि गरेको छ। करिब एक दशकअगाडिको आर्थिक मन्दीले पनि नछोएको धरानमा कोरोनाको महामारीपछि भने व्यापार व्यवसायमा मन्दी बढेको हो।

पहिले नयाँ फेसनका कपडा खरिद गर्न धरान बाहिरबाट समेत ग्राहकहरू आउने गर्थे। दसैं–तिहार जस्ता चाडपर्वमा लगभग एक वर्षको व्यापार १५ दिनमै हुने गरेको व्यापारीहरूको अनुभव छ। तर, पछिल्लो समय भने ठूला कपडा पसलको व्यापार घट्दो क्रममा छ। धरानको कपडा व्यवसायलाई नजिकको सहर इटहरीले पछि पार्दै गएको छ। आर्थिक रूपमा सम्पन्न लाहुरे परिवार विदेश जानु, युवाहरूको विदेशिने क्रम बढ्नु र अनलाइनतर्फ ग्राहकहरूको आकर्षण बढ्नुजस्ता कारणले धरानका ठूला सटरका कपडा व्यवसायीहरू मारमा परेका छन्। भानुचोकमा रात्री बजारको खाट राखेर साना व्यापारीहरूलाई व्यवसाय गर्न पालिकाले अनुमति दिएपछि, ठूला सटर व्यवसायहरूमा ठूलो गिरावट आएको हो। सटरको भाडा तिर्नु नपर्ने भएका कारण सर्वसुलभ मूल्यमा कपडा उपलब्ध भएपछि ग्राहक भानुचोकतर्फ आकर्षित हुन थालेका छन्।

युनिक कलेक्सनका कपडा व्यावसायी युवराज दाहालले यो चाडबाडमा समेत अपेक्षित व्यापार नभएको बताएका छन्। उनले स्टाफ खर्च र सटर भाडा तिर्न कठिनाइ भएको खुलाए। यता, भानुचोकको रात्री बजारमा खाट राखेर व्यवसाय गर्दै आएका व्यापारीहरू भने उपमहानगरपालिकासँग सन्तुष्ट देखिन्छन्। व्यापारी कमल लम्साल भन्छन्, “हाम्रोमा सस्तो र टिकाउ कपडा खोज्ने ग्राहकहरू बढी आउँछन्। कहिलेकाहीँ फेसनका कपडाहरू पनि अर्डर अनुसार उपलब्ध गराइदिन्छौँ। व्यवसाय पनि राम्रै भइरहेको छ।”

ग्राहक मनी राईले पनि रात्री बजारमा सस्तो र गुणस्तरीय कपडा पाएकोमा सन्तुष्टि व्यक्त गर्दै भने, “सटरमा भन्दा धेरै सस्तो कपडा पाएँ। दशैंका लागि ३५०० रुपैयाँको किनमेल गरेँ।” अर्का ग्राहक अंकित ढुंगानाले स्थान साँघुरो भएको र परिवारसहित आउँदा गाह्रो हुने बताए।

नगरपालिकाले ठाउँ उपलब्ध गराएकोमा साना व्यापारीहरू खुसी देखिन्छन् भने ग्राहकहरू पनि सन्तुष्ट छन्। यद्यपि, ठूला व्यापारीहरूको हकमा पालिकाले ठोस योजना ल्याएर राहत दिन सके, ठूला कम्पनीहरूसँग समन्वय गरी समयसापेक्ष फेसन महोत्सवको आयोजना गरे, धरानले पहिलेकै जस्तो कपडाका लागि परिचित आफ्नो साख फिर्ता गर्न सकिनेमा दुईमत छैन।